進階股息投資

話說新鮮人主力持有 0003 香港中華煤氣 (截至呢一刻比重 52.48%)，亦都係新鮮人唯一一隻從未間斷地供嘅股票

係月供股票派息年結 2018 都見到，煤氣係 2018 年已經為新鮮人帶嚟超過 6000 蚊股息
6000 蚊係一個分水嶺，係代表一個月平均股息有 500 蚊，即係如果平均咁供，可以每個月只用股息供多一份煤氣。煤氣近年派息穩定 ($0.23 + $0.12)，即係可見將來新鮮人都可以每個月執行股息投資

新鮮人當然唔會就咁收手，有冇可能諗吓點樣係股價低時再供多 D、股價高時暫時收手呢？

新鮮人依家個諗法係每月某一日以當日收市價做決定，而呢一日當然最好係中銀叫買定離手前一刻啦！如果股價係以往股價嘅 30th percentile 至 70th percentile，咁就會供 500 蚊。如果係低於 30th percentile 就叫做平，可以加注。如果高於 70th percentile 就叫貴，可以收手

呢套規矩應該可以同樣套用係月供嘅銀碼上面，不過新鮮人暫時諗法係玩吓股息投資呢一部份先，操作有問題當交學費都係有限錢

當然，如果新鮮人知道股價幾時叫高、幾時叫低，咁新鮮人直頭應該做埋其他 call put 操作…

我手上嘅以往股價只係局限咗中銀買貨當日嘅價，雖然唔多夠代表性，但始終都叫供咗差唔多 100 期，都有 D 高低位可以見到嘅…

唔準地方似乎會來自做決定一刻同買入一刻股價有滯後…呢個問題似乎可以將 30th percentile 同 70th percentile 拉闊，但就會令到冇咁敏感，可能令到大部份時間都係中間區域

新鮮人估計呢 D 數值其實可能好多網頁都有，等新鮮人得閒再搵吓先！