話說 0004 九龍倉集團以實物分派方式派發 1097 有線寬頻同埋 1997 九龍倉置業
腦海入面其實諗過兩種入帳方法，但其實兩種方法諗深一層都有 D 理念上嘅問題
雖然自己一諗完都知自己會用邊種方法入帳，但為咗梳理思緒同埋諗清楚細節問題，所以將我嘅思路係呢度同大家分享，歡迎大家指教
方法一：猶如派發現金股息
派股都會除淨，如果我將所派發嘅實物嘅現金價值當成即時嘅現金收益，咁九倉當刻嘅賺蝕就會冇分別
好處：
方便：派一次入一次，之後就生死各不相干
壞處：
資料不足：九置係實物派發後先上市，所以當日除淨咗幾多其實唔係用平時條方程式計出嚟
變相買垃圾：有線呢 D 毫股我一定唔會買，但用呢個方法入帳就好似我用高價買咗有線咁
未能顯示長線收益：假設有線爆上 $100，咁樣入帳就會顯示我係用有線而大賺，但現實係因為九倉而賺錢
方法二：計比例
如果只得有線就入唔入都唔差太遠，但最大問題係九置重磅過九倉不得止，我仲諗住之後轉供九置，所以長線收益點樣計就好重要。呢個方法係將會按比例將實物分派得嚟嘅九置同供返嚟嘅九置按比例計算各至收益，咁就合理喇
好處：方法一嘅壞處
壞處：方法一嘅好處
XD…
其實呢個方法都有問題
假設我呢家因實物分派而獲得 1000 股九置，而九置係某一刻係價值 $50
呢 $50000 理論上係全數因為之前供九倉而獲得，而又因為依家比例係 1000：0，所以呢舊錢係全數入係九倉名下，合理
如果呢家九置派息 $10，咁除淨後值 $40。基於 1000：0，所以 $40000 股同 $10000 息都係屬九倉，合理。我又可以將股息再投資落去喇
但如果除淨後我即用 $40 一股供多 1000 股，咁比例就變成 1000：1000 = 1：1
咁 excel 就會將之前 $10000 息自動平分兩份，咁樣就唔多合理喇
真係好亂，亂過亂世魔王！
如果唔用方程式計而手動入帳，當然唔會將之前已入帳嘅 $10000 作錯誤分配，之但係就會好煩囉
仲未計股息再投資呀派股呀等等，諗起都煩
簡單 D 方法係直頭將九置戶口分兩條數去入
所謂最大問題都係因為股數係 discrete，所以如果派股就會有 D 奇怪場面
例如呢家兩個戶口係分別有 1000：900 股，依家實物分派咗 100 股
大家一樣咁除淨，咁呢 100 股應該點樣分落去呢？
定係應該用小數點去用比例除、52.63157895：47.36842105 咁？我其實覺得 OK…
假設冇再供，咁下次就變成 1052.63157895：947.36842105
而呢個比例應該係全等於 1000：900
如果唔計小數咁用 1053：947，個比例就會同 100：900 有少少偏差
可能你會話好少啫
其實唔係…你估煤氣年年 10 送 1 咩？
當派發股數少，中間差 1 股就好重要
例如派 1 股，咁就係有同冇嘅分別，個比例偏差就會被極大化！！！
講咁耐，其實可能只係庸人自擾…哈哈哈！
沒有留言:
發佈留言